Ocannu su segundu cursu de formatzione in limba sarda s’est serradu in bellesa: gràtzias a s’ospitalidade de su diretore e de su personale de su Museu de sas Contzas e a sas cumpetèntzias de sa professora Elisabetta Sanna sos corsistas ant pòdidu visitare su Museu de sas Contzas de Bosa e connòschere mègius sa vida de sos contzadores.
Su Museu de sas Contzas est ospitadu in una contza de su 1700 e esponet sos trastes pro contzare sa pedde segundu sa manera antiga. Sa professora Sanna, fìgia de unu de sos propietàrios de sas contzas istòricas, at ispiegadu comente si contzaiat sa pedde, boghende a campu su lèssicu antigu chi in carchi paràula est imbàtidu finas a nois. Cun s’agiudu de sas fìgias de unu de sos ùrtimos contzadores at ammentadu sa vida de custos operajos e de sas famìllias issoro, narende contos, cantzoneddas e ammentos e ponende in movimentu sa curiosidade de sos corsistas chi ant fatu tantas preguntas e osservatziones.
Una manera bella pro serrare su segundu cursu de formatzione e pro connòschere semper mègius sa limba e sa cultura de su logu in ue vivimus.
