Non teoria ebbia, ma finas pràtica.
Est su motu chi ànimat ocannu s’atividade de formatzione fata dae s’Ufìtziu Limba Sarda a intro de su progetu “Sa limba sarda vivet”, finantziadu cun su dinari de sa L. 482/1999 e L.R. 22/2018 (annualidades 2025-2026-2027).
Dae paritzos annos s’ULS est collaborende cun s’Universidade de sa 3ª Edade de Bosa. Ocannu custu caminu de connoschèntzia de sa limba e de sa cultura nostra s’est fatu esperientziale.
Gràtzias a sas cumpetèntzias e a sa disponibilidade de sa professora Elisabetta Sanna, chi est un’esperta manna de istòria bosinca, amus pòdidu comintzare unu percursu chi nos agiuat a cumprèndere mègius sa Bosa de sos testos chi semus leghende in sas letziones, e sas ìsulas linguìsticas suas.
Amus comintzadu su 17 de làmpadas visitende sa “Piata”, e amus sighidu su 14 de santugaine andende a connòschere sas carreras antigas de “Sa Costa”, in ue sunt ambientados meda de sos contos chi semus leghende.
Peri sas carreras pòberas de “Moroidda” e de “Ùltima Costa”, gràtzias a sos contos de sa professora Sanna, amus connotu mègius sa limba de sos pòberos, diferente dae cussa de sos “ricos de Piata” chi aìamus connotu in sa prima essida didàtica. In custu nos at agiuadu finas sa maestria de sa cantante Adelina Farina, chi amus tentu su praghere de ascurtare cantende su Deus ti salvet Maria e s’Anninnia, che una Musa incastonada in su panorama maestosu de s’Iscala de sa Rosa.
S’ùrtima firmada est istada in sa domo istòrica in ue at bìvidu sa protagonista de su libru “A piedi scalzi”, domo chi oe òspitat sas mastras de su làuru bosincu (“il filet di Bosa”).
Maria Màsala e Celestina Marras de s’assòtziu “Manos de Oro” nos ant mustradu s’arte de laurare e de fàghere sa retza, e pro unu momentu sa carrera Ùltima Costa est torrada comente fiat in antigu, regnu de sas mastras de su làuru, prena de gente.
Sa professora Sanna, chi est finas poetissa, at coronadu sa die bella cun una poesia intitulada “Totu tenet unu prètziu”, in ue si preguntat si su sardu, limba antiga, podet èssere posta in cummèrtziu.
Una die bella a beru, rica de contos, mùsica, poesia e sabidoria totu in sardu.
S’ùrtima letzione itinerante de su cursu de formatzione annualidade 2025 l’amus a fàghere su 28 de santugaine, andende a connòschere logos, limba e traditziones de sas dies de sos Mortos.
Gianfranca Piras
